По речиси една година од почетокот на судскиот процес за кочанската трагедија, кој опфаќа повеќе од 30 обвинети, предметот влегува во нова фаза во која одбраната ќе започне со изведување на своите докази, вклучувајќи материјални докази и листа од 244 сведоци. Ова го соопшти претседателката на Основниот кривичен суд Скопје, Даниела Димовска, на нејзиниот прв брифинг со новинарите, каде што беа презентирани детали за работата на судот, кадровските предизвици и статистиката за старите предмети.
Димовска информираше дека на 14 септември завршило изведувањето докази од страна на Јавното обвинителство, во кое беа презентирани 1.309 докази и сослушани 45 сведоци и пет вештаци низ 49 одржани рочишта без ниту едно одложување. Во наредните денови се очекува одлука и за притворот на првообвинетиот Дејан Јованов, сопственик на објектот „Пулс“, за кој одбраната понудила и имотна гаранција од 200.000 евра, за што се чека мислење од Обвинителството.
Говорејќи за актуелните судски предмети, претседателката на судот се осврна и на прашањата поврзани со нејзиниот брат, кој е меѓу осомничените во предмет поврзан со кочанската трагедија, истакнувајќи дека овој брифинг е посветен на работата на Основниот кривичен суд Скопје и дека не може да коментира постапки кои се водат во Кочани, но додаде:
– Постои перцепција оти мојата функција би можела позитивно да влијае врз состојбата на мојот брат, но функцијата на судија носи и пријатели и непријатели, поради што не би знаела во каква положба се наоѓа тој.
На брифингот беа претставени и податоци за намалувањето на старите предмети од 896 во август 2025 година на 368 во август 2026 година, како и податоци за други значајни предмети како „Крмзов“, „Титаник“, „Беланоца“ и „Талир 1“, кој повторно ќе почне од почеток. Воедно, беше укажано на сериозниот недостиг на кадар, имајќи предвид дека од предвидените 628 работни места во моментов се активни само 208, а судот се соочува и со одлив на судии во пензија.