Исклучително тежок и критичен ден пребродија струмичките пожарникари, соочувајќи се со огнена стихија која симултано изби на неколку локации во регионот. Најсериозна соочување со огнените јазици имаше во атарите околу селата Петралинци, Еднокукево, Мокриево и Бајково, каде покрај шума, сува трева и ниска вегетација, пламенот почна да голта и земјоделска опрема.
Брзиот одговор и пожртвуваноста на противпожарните тимови спречија катастрофа од поголеми размери во населените места, каде пламенот буквално ги лижеше ѕидовите на објектите. Како што алармираат од Територијалната противпожарна единица (ТППЕ) Струмица, благодарение на координираната и брза акција, од сигурно уништување биле одбранети неколку станбени куќи, но и верскиот објект во селото Бајково.
Од струмичката противпожарна единица излегоа со официјално соопштение во кое детално го опишаа критичниот момент кога огнот се закани по имотите на граѓаните.
„Со огромен труд, пожртвуваност и навремена интервенција, пожарникарите успеаја да спасат повеќе куќи, како и црквата ‘Св. Петар и Павле‘ во селото Бајково, иако огнот веќе беше стигнат до самите објекти. Со тоа е спречена поголема материјална штета“, соопштија од ТППЕ Струмица.