Турските власти издадоа жолто предупредување за 19 провинции низ земјата поради најавените обилни врнежи од дожд, грмотевици и ризик од поплави.
Според Турската метеоролошка служба, невремето може да предизвика поплави, ненадејно дотекнување вода, лизгање на земјиштето и силни ветрови.
Како што пренесува ТРТ Хабер, најсилните врнежи се очекуваат во егејските, медитеранските и југоисточните делови на земјата, додека во одделни крајбрежни области се предвидуваат уште поинтензивни дождови.
Покрај врнежите од дожд и грмотевиците, метеоролозите најавуваат можност за локална појава на град, силни удари на ветер и можни прекини и проблеми во сообраќајот.
Во провинциите Елазиг, Тунџели, Бингол, Газиантеп, Шанлиурфа и Дијарбакир, лошите временски услови се очекува да продолжат сè до четврток наутро. Надлежните апелираат до граѓаните да бидат внимателни и да преземат заштитни мерки.
Паралелно со метеоролошките предупредувања, здравствените установи во земјата денеска ќе работат со скратено работно време поради почетокот на празникот Ден на Републиката, кој официјално започнува во 13 часот.
Амбулантските клиники во државните болници и центрите за семејна медицина ќе примаат пациенти само во текот на претпладнето, додека службите за итна медицинска помош ќе работат непрекинато, објави CNN Turk.
Во четврток, на самиот Ден на Републиката, амбулантите и центрите за семејна медицина нема да работат, а здравствената заштита за граѓаните ќе се одвива исклучиво преку ургентните центри и итната помош.