Подготовките за претстојниот бесплатен концерт на светската музичка ѕвезда Шакира, закажан за 2 мај, беа прекинати од трагична несреќа на плажата Копакабана. При монтажата на импозантната сцена, на која екипите работеа повеќе од две недели, еден техничар го загуби животот.
Според информациите од локалните власти и противпожарната служба, несреќата се случила кога системот за подигнување на конструкцијата откажал, при што нозете на работникот биле приклештени и тешко повредени. И покрај итната интервенција и транспортот до болница, мажот им подлегна на повредите.
„За жал, техничарот почина во болницата“, потврдија кратко од компанијата која е организатор на настанот.
Настанот го отвори прашањето за безбедноста, особено по инцидентот од 13 април, кога полицијата пронашла и отстранила експлозивна направа на крајбрежното шеталиште на Копакабана. Локалните власти потврдија дека станувало збор за шок-бомба, несмртоносна направа наменета за привремена дезориентација, но случајот предизвика зголемена претпазливост кај надлежните.
Рио де Жанеиро се подготвува за масовен прилив на посетители. За концертот на Шакира се очекуваат стотици илјади фанови од Бразил и од странство. Градот планира безбедносни мерки на високо ниво, со оглед на тоа што периодот од март до јуни се очекува да привлече 3,5 милиони туристи. Традицијата на бесплатни концерти на Копакабана привлекува милиони луѓе, при што лани на Мадона присуствуваа 1,6 милиони, а претходно на Лејди Гага дури 2,1 милиони посетители.