Авантурата на странска туристка во планинскиот предел на Албанија се претвори во вистинска борба за преживување, откако таа беше касната од најотровната змија во земјата.
Инцидентот се случил на 21 јуни околу 10:19 часот во близина на Валбона, додека Ејми, која веќе три и пол години живее во Нов Зеланд, трчала по локална планинска патека.
Веднаш по каснувањето, таа успеала да ја сними змијата за подоцнежна идентификација, седнала на патеката и го повикала бројот за итни случаи 112. Сепак, поради недостапниот терен, спасувачите на почетокот имале сериозен проблем да ја утврдат нејзината точна локација.
Во спасувањето се вклучил и нејзиниот татко од Австралија, кој побарал од неа да ја испрати точната локација преку специјализираната апликација What3Words, со што им олеснил на властите.
Паралелно со ова, туристката стапила во контакт и со сопственик на пансион во Скадар, кој преку WhatsApp ги алармирал локалните служби и успеал да координира испраќање на медицинска екипа на терен.
Додека ја чекала помошта, Ејми првично направила грешка со подврзување на раната со облека, но брзо го отстранила турникетот и ставила соодветен компресивен завој, останувајќи целосно мирна.
По успешната интервенција, таа упати јавен апел до сите туристи кои ги истражуваат оддалечените планини секогаш со себе да носат уреди за итни случаи како inReach или личен локаторски светилник (PLB), да користат апликации за локација и да имаат прибор за прва помош.
Ејми изрази огромна благодарност до локалното население и надлежните служби за брзата реакција, нагласувајќи дека сега е надвор од животна опасност.