Пратеникот од редовите на ВМРО-ДПМНЕ, Бојан Стојаноски, на денешната прес-конференција ги демантираше изнесените ставови на лидерот на опозицијата, Венко Филипче, посочувајќи дека беа изнесени несериозни и неточни економски показатели.
Според Стојаноски, официјалните податоци од Државниот завод за статистика потврдуваат позитивни движења и стабилен раст на домашното стопанство.
„За мене, и како пратеник и како политичар, е шокантно лидер на опозицијата да излезе од македонското Собрание и да презентира бројки што се целосно несериозни и неточни. Особено изненадува начинот на кој се толкуваат економските показатели, од аспект што е целосно нереален и кој не се темели врз официјални податоци“, изјави Стојаноски.
Тој посочи дека последниот извештај на Државниот завод за статистика покажува дека македонската економија во вториот квартал од 2026 година остварила раст од 4,3 проценти, што претставува највисок резултат во изминатите четири години.
„Истовремено, продолжува позитивниот тренд на раст на македонската економија во осум последователни квартали, при што растот е повисок од 3 проценти. Сметам дека ваквиот континуитет е исклучително значаен“, нагласи Стојаноски, додавајќи дека главни двигатели се градежништвото со раст од 21,9 проценти и бруто-инвестициите со раст од 14,5 проценти.
Осврнувајќи се на обвинувањата во врска со јавниот долг и најавите за нови задолжувања, Стојаноски појасни дека станува збор за подготовки за сервисирање на претходно преземени обврски.
„А наредната година, како и во годините потоа, Република Македонија и сите нејзини граѓани треба да сервисираат околу 8 милијарди евра долг, создаден во периодот на Владата на СДСМ и ДУИ, во која министер беше и Венко Филипче. Оваа година досега се сервисирани 1,5 милијарди евра. Во 2027 година треба да се сервисираат 1,5 милијарди евра, во 2028 година – 1,9 милијарди евра, 2029 1,3 милијарди евра, а во 2030 година – 1,4 милијарди евра“, рече тој.
Пратеникот нагласи дека во моментов јавниот долг изнесува 58,8 проценти, за разлика од крајот на јуни 2024 година кога надминувал 60 проценти, апелирајќи политичките актери во своите анализи да се потпираат исклучиво на официјалните статистички податоци.