Индустриското производство во мај годинава е намалено за 2 проценти во однос на мај минатата година, додека во периодот јануари – мај годинава бележи пад од 0,3 проценти споредено со истиот период лани.
Државниот завод за статистика објави дека во мај годинава, во однос на мај лани, индустриското производство бележи пораст од 6,1 проценти во секторот Снабдување со електрична енергија, гас, пареа и климатизација, додека опаѓање има во Рударство и вадење камен од 3,6 проценти и во Преработувачка индустрија од 2,6 проценти.
Најголемо влијание врз падот на индустриското производство има намалувањето во одделите: производство на електрична опрема, производство на машини и уреди, како и производство на моторни возила, приколки и полуприколки.
Во рамки на преработувачката индустрија, намалување е забележано во повеќе сектори, меѓу кои: производство на прехранбени производи, пијалаци, тутунски производи, текстил, облека, хемикалии и хемиски производи, фармацевтски производи, метали, фабрикувани метални производи, електрична опрема, машини и уреди и моторни возила.
Според главните индустриски групи, во мај годинава во однос на мај лани, пораст има кај енергијата за 6,5 проценти и интермедијарните производи за 3,4 проценти, додека пад е забележан кај капиталните производи за 3,3 проценти, трајните производи за широка потрошувачка за 1,1 процент и нетрајните производи за широка потрошувачка за 8,4 проценти.