Партиски делегации предводени од лидерите на ВМРО-ДПМНЕ и Движење ЗНАМ – За наша Македонија, Христијан Мицкоски и Максим Димитриевски, в сабота ќе одржат средба во врска со најавената реконструкција на Владата.
Министерот за јавна администрација и генерален секретар на ЗНАМ, Горан Минчев, изјави дека на средбата ќе побараат информации за точниот опфат на реконструкцијата, бидејќи јавноста често мисли дека тоа се однесува само на министрите.
-Меѓутоа, тука има и голем број на втор ешалон, трет ешалон – избрани и именувани функционери коишто, исто така, се на тие позиции со соодветна намена да испорачаат резултат, рече Минчев во емисијата „Само интервју“ на ТВ Канал 5.
Тој појасни дека како партија веќе направиле евалуација на работата на сите нивни кадри во изминатиот период и дека нивниот став во моментов е дека министрите и другите функционери одлично си ја вршат својата работа.
-Направивме ревизија на нивното двегодишно работење и нашиот став во овој момент е дека нашите двајца министри и сите други функционери ревносно и одлично си ја вршат својата работа. За ова прашање нема дали сакаш некого или не сакаш туку дали испорачува резултати или не испорачува резултати. Но, сепак, господинот Мицкоски е премиер и ние би сакале на таа средба в сабота да ги чуеме аргументите и од другата страна, истакна Минчев.
Како аргумент за нивната успешност, тој го посочи и претседателот на Европскиот совет, Антонио Кошта, кој неодамна во Скопје изјавил дека има видлив напредок токму во ресорите правда и јавна администрација.
Минчев потсети дека пред две години направиле коалициски договор со ВМРО-ДПМНЕ за цел четиригодишен мандат и додаде дека со партијата на Мицкоски имаат идентични ставови за неколку прашања, вклучувајќи го и ригидниот став против промена на Уставот.
Во однос на идните политички чекори, генералниот секретар на ЗНАМ потенцираше дека партискиот став е на следните парламентарни избори да настапат целосно самостојно.
-Но, исто така, мора да ги разгледаме сите опции за да ги слушнеме аргументите од кој било наш колаициски партнер. Нашиот став е дека ние сме спремни веднаш, утре ако е потребно, да излеземе на избори и тоа со самостоен настап, заклучи Минчев.