Претседателот на Србија, Александар Вучиќ, денеска ја информираше јавноста за опсежна операција на српската полиција и војска која од изутрината се одвива во областа Кањижа, во близина на границата со Унгарија.
Причината за акцијата е пронаоѓањето на експлозив со огромна разорна моќ поставен во непосредна близина на критичната гасна инфраструктура, поточно крак од гасоводот „Турски тек“ кој ги поврзува Србија и Унгарија.
Вучиќ преку својот профил на Инстаграм соопшти дека веќе остварил телефонски разговор со унгарскиот премиер Виктор Орбан за да го извести за сериозноста на ситуацијата.
„Тукушто завршив телефонски разговор со унгарскиот премиер Виктор Орбан, во кој го информирав за првите резултати од истрагата на нашите воени и полициски власти… Нашите единици пронајдоа експлозиви со разорна моќ и стаповите потребни за нејзино активирање. Му кажав на премиерот Орбан дека ќе го информираме за понатамошниот тек на истрагата“, напиша Вучиќ.
Во дополнителна изјава за медиумите, српскиот претседател откри повеќе детали. Тој појасни дека експлозивите биле откриени од страна на специјални кучиња трагачи на само неколку стотини метри од цевките на гасоводот. Според неговите зборови, станува збор за два големи ранци полни со експлозивни материјали.
„Доколку имаше прекин, Унгарија немаше да има гас, ниту ние на север. Ќе се справиме безмилосно со оние што ја загрозуваат инфраструктурата на Србија!“, порача Вучиќ.
Истрагата за откривање на сторителите и мотивите за овој обид за саботажа е во тек.