Собранието денеска во рамки на 85. седница ги констатираше оставките на претседателот на Регулаторната комисија за енергетика, водни услуги и услуги за управување со комунален отпад Марко Бислимоски и на членот на Државната комисија за спречување на корупцијата и судир на интереси Цвета Ристовска. По усвојувањето на дневниот ред, започнаа двочасовните опозициски прашања до премиерот и министрите.
На дневен ред на 85. седница се Предлог – одлука за давање овластување за склучување на поединечен колективен договор, Предлогот за избор на судија на Уставниот суд на Република Северна Македонија, Предлог на одлука за избор на претседател и членови на Советот за граѓански надзор, Предлог за именување на (непрофесионално ангажиран) член на Советот на експерти на Агенцијата за супервизија на осигурување.
Пратениците ја утврди потребата за носење на Предлог на закон за изменување на Законот за постапување со бесправно изградени објекти, по скратена постапка, со којшто се предвидува продолжување на рокот за дополнителни пет години за легализација на бесправно изградените објекти, односно законот да важи до 3 март 2031 година.
Во прво читање се Предлог на закон за органско земјоделско производство и Предлог на закон за изменување и дополнување на Законот за минимална плата во Република Северна Македонија.
На дневен ред на седницата е и Предлог-резолуција за почитување на стандардите на правична постапка во меѓународното судење против поранешните челници на институциите на Република Косово.