Собранието вечерва ги донесе измените на Законот за задолжување на државата кај Меѓународната банка за обнова и развој – Светска банка по Договорот за заем за финансирање на Проектот за градење ефективни, транспарентни и отчетни институции за управување со јавните финансии, како и Законот за задолжување по Програмската рамка за подобрување на јавните расходи, отчетноста и даночната администрација, двата по скратена постапка.
Заменик-министерот за финансии Николче Јанкуловски, образложувајќи го предлог-законот, посочи дека со него се затвора постојана заемска рамка од 20 милиони евра и се отвора нова од 25 милиони евра, со цел подобрување на јавните расходи, отчетноста и даночната администрација.
-Целта на измените е продолжување и забрзување на реформите во управувањето на јавните финансии. Од 25-те, 23 милиони евра се обезбедуваат преку инструментот Програма за резултати, исто преку Светска банка, при што средствата ќе се повлекуваат само при исполнување на однапред утврдени мерливи, и проверливи резултати. Дополнителни два милиони евра се наменети за техничка помош, градење на институционални капацитети, управување со промените и координација на проектот, рече Јанкуловски.
За збор се јави пратеникот Фатмир Битиќи од СДСМ, кој истакна дека ова решение било нудено и од претходната власт, а актуелното мнозинство тогаш упатувало остри критики. Тој потенцираше дека истиот проект сега се реализира со повисоки финансиски средства.
-И тогаш беше кажано дека ваков закон е апсолутно потребен и дека треба што поскоро да се спроведе. За тоа постојано се зборуваше од оваа говорница, а истото го посочуваше и експертската јавност…Ние планиравме тоа да го изведеме со 19 милиони евра, денес планирате истото да го реализирате со 23 милиони евра – односно околу 25 проценти повеќе. Дополнително, ако тогаш беше планирано проектот да се реализира според процедурите на Светската банка, денес велите дека тоа ќе се направи според Законот за јавни набавки. За оние што ја познаваат оваа област, јасно е дека процедурите на Законот за јавни набавки во Република Македонија се под стандардите на Светската банка. Разликата, драги мои е во тоа што ние понудивме решение и ви оставивме решение. Вам ви беа потребни две години за да сфатите дека ќе ви требаат 25 проценти повеќе средства, без притоа да смените ниту една запирка во системите ИФМИС и во САМИС. Впрочем ИФМИС е Интегриран финансиски менаџмент информациски систем, а САМИС е Информациски систем за управување со државната помош, кој вропчем ќе ги дигитализира процесите во институциите. Нема ништо новo, освен што цената е за 25 проценти повисока – рече Битиќи.
Со првиот закон се предвидува откажување на неискористениот дел од претходниот заем во износ од 19,2 милиони евра. Вториот заем од 25 милиони евра е со рок на отплата од 12 години, со вклучен грејс-период од 3 години и варијабилна каматна стапка заснована на шестмесечен ЕУРИБОР.
Во продолжение на 120. седница, пратениците ја изгласаа и Завршната сметка на Буџетот за 2025 година, како и законските измени за задолжувањата кај ЕБОР и ЕИБ за Железничкиот коридор VIII на делницата од Крива Паланка до границата со Бугарија.