Силно невреме вчера ја зафати југозападна Србија, проследено со силен дожд, ветер, град и грмотевици кои направија големи штети.
Најмногу погодени од градот се селата Божетичи и Штитково над Нова Варош, како и селото Куќани, кое се наоѓа од другата страна на реката Увац. Како што раскажал еден жител, ова е вторпат годинава да паѓа град. Првпат земјоделските посеви некако „преживеале“, но денешното невреме целосно ги уништило.
– Удираше многу силно! Се отвори небото. Од мака не можев ни да гледам како паѓа. Со лопати го собираме мразот од градот – изјавил жител од маалото Луковиќи.
Најголема штета, според мештаните, е направена на зеленчуковите насади, а силниот дожд предизвикал оштетувања и на селските макадамски патишта.
Инаку, невреме какво што жителите не паметат и во саботата го погоди Кокин Брод, каде освен градот, силниот ветер корнеше дрвја и откриваше покриви на куќи. Поради паднати дрвја, магистралниот пат кон Црна Гора беше блокиран.
Силно невреме вчера беснееше и во Македонија. Силно невреме со пороен дожд, силен ветер, грмежи и град синоќа го зафати Стар Дојран, при што беа откорнати десетици повеќегодишни дрвја на повеќе локации во градот.
Паднати јавори, борови, багреми и црници предизвикаа материјална штета, оштетувајќи настрешници, урбана опрема на плажата, неколку возила, како и покрив на еден од дуќаните на градскиот пазар, информираа локалните власти.
Од Доброволното противпожарно друштво „Дојран“ соопштија дека нивните екипи веднаш излегле на терен, каде затекнале паднати големи дрвја во градскиот парк, на игралиштето со справи за вежбање, кај детскиот рингишпил на шеталиштето, во близина на хотелот „Романтик“ и пицеријата „Вавилон“.
Поради паднато дрво на главниот пат, сообраќајот извесен период се одвивал само по една коловозна лента. Во делови од градот неколку часа имало и прекин на електричната енергија од безбедносни причини.
УХМР и за денеска најавува пеколно топло време, но и невреме во Македонија со силен ветер, дожд, грмотевици и изолирана појава на град. Ново невреме се најавува и во Србија.