Јавното претпријатие „Македонијапат“ информира дека на неколку патни правци низ државата се бележат врнежи од снег и намалена видливост. Снег со слаб интензитет паѓа на патиштата Пехчево-Обозна-Берово и Суви Лаки, но засега не се задржува на коловозот.
Многу посериозна е состојбата со маглата, која ја намалува видливоста до 100 метри на планинските премини Стража и Ѓавато, како и во Крушево.
„Сообраќајот на државните патишта се одвива непречено, по влажни коловози. На одредени патни правци кои поминуваат низ усеци и клисури можна е појава на поситни одрони“, соопштуваат од „Македонијапат“.