Австралија започна да воспоставува построга контрола врз големите социјални платформи со примена на нов закон што забранува користење на социјални мрежи за деца под 16 години, соопшти премиерот Ентони Албанезе.
„Ова се случува првпат во светот. Австралија покажува дека е доста. Станува збор за тоа нашите семејства да ја вратат контролата“, рече Албанезе по стапувањето во сила на забраната.
Американската корпорација Мета реагираше предупредувајќи дека ограничувањето може да ги насочи младите кон алтернативни, помалку регулирани и потенцијално поопасни апликации.
„Постојано изразуваме загриженост дека овој лошо замислен закон би можел да ги турка тинејџерите кон помалку регулирани платформи или апликации. Сега гледаме дека тие загрижености стануваат реалност“, наведува компанијата во соопштението.
Во меѓувреме, апликациите Lemon8 и Yope – кои моментално не се опфатени со забраната – забележуваат нагло зголемување на преземањата во Австралија.
Мета истакна дека голем дел од алтернативните апликации немаат безбедносни механизми слични на оние што ги нуди за младите корисници. „Ќе ги почитуваме нашите законски обврски, но остануваме загрижени дека овој закон ќе ја ослабне безбедноста на младите луѓе“, додаваат од компанијата.
Илон Маск, сопственикот на платформата Икс, исто така изјави дека ќе се придржуваат до новите правила: „Ова не е наш избор – тоа е пропишано со австралискиот закон“, нагласи тој по стапувањето во сила на мерката.
Со ова, Икс стана последната од десетте засегнати платформи што официјално се усогласија со новата регулатива, меѓу кои се и Фејсбук, ТикТок и Јутјуб.
Законот има за цел да ги заштити малолетниците од штетни алгоритми, онлајн вознемирување и експлицитна содржина со која, според властите, се среќаваат многу рано.
Компаниите што нема да го блокираат пристапот за корисници под 16 години ќе се соочат со казни до 33 милиони американски долари.
Новата пилот-иницијатива привлече значителен интерес на глобално ниво.