Силното невреме со обилни врнежи од дожд, грмотевици и силен ветер предизвика сериозни штети на грчкиот остров Крф, во областа Епир, како и во градовите Јанина, Арта, Парга и Игуменица. Лизгања на земјиштето, паднати карпи, блокирани патишта и поплави ги погодија западните и северозападните делови на Грција, јави дописничката на МИА од Атина.
На Крф, обилните дождови направија големи проблеми во северниот дел на островот, при што многу области останаа непроодни. Слична е ситуацијата и во поширокиот регион на Епир, каде што реката Каламас се излеа и поплави земјоделски површини.
Според Националната опсерваторија во Атина, времето во Грција во периодот од вторникот до вчера покажало две различни „лица“: силни дождови и интензивни грмежи во западните и северните делови, додека на југ и исток врнежите беа многу ограничени и со слаба јачина.
Најголемото измерено количество врнежи беше во Коница, каде што паднаа 246,8 милиметри дожд, а 29 од вкупно 543 активни метеоролошки станици регистрираа над 100 милиметри дожд. Во делови од Тесалија, централна Грција, Пелопонез, Евија, Крит и островите во Егејското море, во истиот период не е забележан дожд.
Локалните власти апелираат до граѓаните да ги почитуваат предупредувањата и да се придржуваат кон мерките за безбедност на поплавените и небезбедни подрачја.