Претседателката Гордана Сиљановска-Давкова, во вилата „Билјана“ во Охрид оствари средба со добитниците на признанието „Инженерски прстен“.
На средбата присуствуваа и министерот за дигитална трансформација Стефан Андоновски, претседателот на Инженерската институција на Македонија, Андреј Лепавцов и претседателот на Комората на овластени архитекти и овластени инженери, Дејан Метикош.
Претседателката им го честиташе признанието на младите инженери, истакнувајќи ја важноста на нивното знаење, стручност и потенцијал за идниот развој на државата, со акцент на создавањето услови најуспешните кадри да го остварат својот потенцијал во земјава.
За време на дебатата, лауреатите ги изложија своите критички видувања за состојбите во високото образование и укажаа на потребата од подобри услови за работа со цел да се спречи нивното заминување од државата. Беше предложено унапредување на законската рамка за соодветна евалуација на успесите при вработувањата на универзитетите и избегнување на генерациски вакуум.
На средбата се отворија и прашања за јавната архитектура, дата центрите, поставеноста на фотоволтаици на плодно земјиште, одливот на кадри во соседството, како и апликацијата на европските стандарди (еврокодови) во домашната регулатива. Од областа на агрономијата беше истакната важноста на дигиталните технологии за зголемување на приносите во земјоделството.
Министерот Андоновски ја објасни офанзивата на дигитализацијата, а претседателот на Комората, Метикош, упати покана за експертски настан за примената на стандардите на крајот на септември. Младите инженери истакнаа дека се спремни да превземат одговорност за технолошкиот развој во земјава.
Сиљановска-Давкова предложи воспоставување база на добитниците на признанието за нивно подобро поврзување и вклучување во развојни проекти, потенцирајќи дека знаењето на младите инженери е значаен ресурс за државата.
„Доколку сакаме развиена држава, мораме да им дадеме простор на младите инженери да создаваат тука“, истакна Претседателката.