По повод 22 Ноември – Денот на албанската азбука, претседателката Гордана Сиљановска-Давкова упати честитка до сограѓаните Албанци, истакнувајќи ја моќта на јазикот и писмото како темелни вредности.
Таа нагласи дека јазикот и писмото го обликуваат колективниот идентитет и ја зајакнуваат духовната поврзаност меѓу генерациите, потсетувајќи на историското значење на Битолскиот конгрес од пред 117 години, каде што била унифицирана азбуката.
Претседателката Сиљановска-Давкова ја искористи приликата да ја истакне улогата на албанскиот јазик во мултиетничката држава:
„Почитта кон јазикот и кон писмото на секоја заедница ја зајакнува социјалната кохезија и го сплотува македонското мултиетничко општество. Албанскиот јазик е дел од раскошниот мозаик на различностите што е влог во иднината на нашата заедничка татковина.“
На крајот од честитката, таа им оддаде признание за придонесот во образованието и културата, повикувајќи на заедничко градење на државата: „Продолжуваме заеднички да ја градиме државата во духот на почит, еднаквост и единство.“