Претседателката Гордана Сиљановска-Давкова, по повод Меѓународниот ден на трудот, упати порака до граѓаните во која потенцира дека овој празник е потсетник на долгата и достојнствена борба за признавање на трудот како извор на вредности.
Таа истакна дека Први мај е момент за соочување со клучните прашања за состојбата со работничките права во земјава.
„Дали ги почитуваме општо прифатените норми на меѓународното трудово право?; дали сме само уставно, или и во стварноста социјална држава?; дали социјалната правда е идеал или реалност?; дали работничкиот труд е соодветно вреднуван, односно дали работниците се правично наградени за работата и можат да напредуваат согласно знаењето и вложениот труд?“, прашува претседателката во својата порака.
Сиљановска-Давкова во пораката ги адресира и прашањата за безбедноста на работното место, случаите на присилна работа, како и достапноста на работните места под еднакви услови за сите.
Според неа, уживањето на економските и социјалните права директно го детерминира квалитетот на културните права на работниците.
Претседателката нагласи дека синдикалното организирање и социјалниот дијалог се клучни предуслови за баланс меѓу економските интереси и социјалната правда.
„Како претседателка на сите граѓани, потсетувам дека имаме обврска да градиме општество во коешто трудот се цени и вреднува, а социјално-економските права се остваруваат!“, се наведува во соопштението.
На крајот, таа порача дека односот кон работниците мора да биде како кон вреден социјален капитал со цел тие да останат во државата.
„Да сфатиме дека само задоволни работници може да бидат вредни и продуктивни! Среќен Први мај!“, стои во честитката од претседателката.