Претседателката Гордана Сиљановска-Давкова ги оцени изборните резултати во Бугарија како очекувани и најави дека со идниот премиер, кој се очекува да биде Румен Радев, ќе се трага по нови решенија за надминување на билатералниот спор кој ги кочи македонските евроинтеграции.
Во изјава за медиумите, претседателката потенцираше дека иако со Радев имаат различни ставови, меѓу нив постои взаемна почит и подготвеност за разговор.
„Сум го запознала господинот Радев, многупати сум го сретнала. Не се согласуваме за многу работи, но умееме да се сослушаме со почит и да заклучиме дека ќе бараме решение“, рече Сиљановска-Давкова.
Според неа, актуелниот глобален безбедносен контекст и драматично променетиот меѓународен поредок ја зголемуваат важноста на стабилноста на Балканот. Таа истакна дека Македонија има 100 отсто усогласена надворешна и безбедносна политика со Европската унија, што е аргумент плус за откочување на процесот.
„Очекувам да се видиме да разговараме, се разбира, со двете знамиња и да трагаме по ново решение“, заклучи претседателката, изразувајќи надеж дека големото искуство на Радев ќе биде искористено за надминување на предизвиците кои се таложеа изминатиот период.