Претседателката Гордана Сиљановска-Давкова денеска го прими Акан Сувер, претседател на фондацијата „Мармара“.
На средбата се разговараше за улогата на фондацијата во поттикнувањето на меѓународната соработка и регионалниот дијалог, како и за можностите за продлабочување на македонско-турските односи.
Претседателката ја истакна улогата на Република Турција како наш сојузник и поддржувач, од независноста до денес, но и улогата на турската заедница како мост на соработка меѓу двете држави.
Посебно внимание беше посветено на Евроазискиот економски самит, чие 29 издание ќе се одржи во мај во Истанбул, во организација на фондацијата.
Претседателката оцени дека станува збор за важна платформа што обединува државници, политичари, академици, бизнис-лидери, претставници на граѓанското општество и верски лидери, а преку годинешната тема „Глобална одговорност“ дава придонес во напорите за справување со кризите на 21 век: политичката, безбедносната, економската, еколошката и кризата на моралот.
Таа посочи и на значајната улога што Евроазискиот економски самит ја има за македонските компании и можноста што ја нуди за нивно преставување пред турските партнери.
На средбата двајцата соговорници разменија мислења и за актуелните состојби на Блискиот Исток.