Градоначалникот на Општина Дебрца, Златко Сиљаноски, на денешната прес-конференција истакна дека во изминатиот период се реализирани или донесени во напредна фаза на градба повеќе од 51 процент од четиригодишната изборна програма, нагласувајќи дека општината бележи значителен економски и инфраструктурен напредок.
Како најважна вест за локалната економија, Сиљаноски ја најави изградбата на првата капитална инвестиција вредна 6 милиони евра во село Мешеишта.
„Почитувани, за првпат во Дебрца, во село Мешеишта, во фаза на изградба е нова капитална инвестиција вредна 6 милиони евра. Се отвора фабрика за производство на еластични огради, која ќе донесе нови работни места. Со ова докажуваме дека Дебрца станува сигурен партнер за сериозни инвеститори!“, истакна градоначалникот.
Тој се осврна и на бројните инфраструктурни зафати во населените места, посочувајќи ги проектите за реконструкција на патишта, улично осветлување, водоводни мрежи и спортски терени, како и подобрувањето на работењето на ЈКП „Дебрца“ преку нови возила и опрема.
Во своето обраќање, Сиљаноски ги нагласи и новите социјални мерки и поддршката за младите, семејствата и образованието, меѓу кои субвенциите за возачки испити, бесплатни училишни униформи за сите 178 ученици, како и бесплатниот неделен превоз до Охрид. На крајот, тој потсети дека според податоците од Центарот за економски анализи, Дебрца остварила скок од 25 проценти и се наоѓа меѓу петте општини со најголем напредок во даночната транспарентност во државата.