Земјотрес со магнитуда од 6,2 степени според Рихтеровата скала денеска го погоди западниот јапонски регион Чугоку, по што следеа серија силни потреси, соопшти Јапонската метеоролошка агенција.
Епицентарот на првиот земјотрес бил во источниот дел на префектурата Шимане, а од агенцијата информираат дека нема опасност од појава на цунами.
Компанијата „Чугоку Електрик Пауер“, која управува со нуклеарната централа Шимане, лоцирана на околу 32 километри од епицентарот, соопшти дека работењето на нејзината единица број 2 продолжува нормално.
И Јапонската агенција за регулирање на нуклеарната енергија потврди дека по земјотресот не се забележани никакви неправилности во работењето на нуклеарните објекти.
Вториот блок на централата Шимане беше рестартиран во декември 2024 година, првпат откако сите јапонски нуклеарни централи беа затворени по катастрофата во Фукушима во март 2011 година.
Земјотресот имал сеизмички интензитет од горен 5 на јапонската скала од 1 до 7, што е доволно силно за да го отежни движењето без поддршка.
По потресот, железничкиот превозник „Вест Јапан Рејлеј“ соопшти дека сообраќајот на брзите возови е привремено прекинат на погодените делници.