Црногорската полиција го уапси 22-годишниот А. И. од Беране под сомнение дека со автомобил го прегазил своето едногодишно дете, а потоа се обидел да ја прикрие трагедијата со лажно тврдење дека детето паднало од објект.
По пријавата од здравствената установа, полициските службеници извршиле првичен разговор со таткото, кој се обидел да го прикрие вистинскиот тек на настаните.
„Полициски службеници веднаш беа испратени во здравствената установа, кои го утврдија идентитетот на едногодишното дете и го испрашаа таткото А. И. (22). Тој во таа прилика изјави дека детето починало како последица на пад од покривот на помошна монтажна зграда“, соопшти полицијата.
За случајот веднаш биле известени дежурните обвинители, а телото на детето било пренесено на обдукција во Клиничкиот центар на Црна Гора.
Сепак, за време на увидот и целоноќната истрага, инспекторите се посомневале во изјавата на 22-годишниот татко. Понатамошната кривична истрага го открила вистинскиот начин на кој настанале смртоносните повреди.
„Според собраните информации, утврдено е дека таткото на детето, како што се верува, додека излегувал од гаражата со својот автомобил, го удрил детето, поради што починало“, се вели во соопштението на црногорската полиција.
Полициските екипи извршиле детален увид на местото на трагедијата, а автомобилот е запленет за вештачење.
По наредба на обвинителот од Основното државно обвинителство во Беране, А. И. е уапсен под сомневање за сторено кривично дело „тешки дела против безбедноста на јавниот сообраќај“.