Собранието на Република Северна Македонија по скратена постапка ги изгласа измените на Законот за студентски стандард, предложени од група пратенички на ВМРО-ДПМНЕ, кои носат сериозни промени во финансирањето на сместувањето и стипендиите.
Со новото законско решение се воведува целосна категоризација на студентските домови во два типа. Првиот тип ги опфаќа енергетски ефикасните и реконструирани објекти, додека во вториот тип влегуваат постојните, односно нереновирани домови.
Оваа поделба директно ќе влијае врз висината на партиципацијата за сметка на студентите. За објектите од Тип 1, државата во иднина ќе покрива само до 40% од трошоците (наместо досегашните 50%), додека за нереновираните домови од Тип 2, партиципацијата останува до 50%.
Тоа практично значи дека престојот во реновираните домови ќе се плаќа поскапо и ќе се утврдува според реалните трошоци, што веќе отвора стравувања во јавноста од создавање „двокласен систем“ каде подобрите услови ќе бидат достапни само за оние кои можат да платат повеќе.
Сериозни промени претрпува и самиот систем за државно стипендирање, каде што се менува соодносот на квотите за распределба:
- Социјални категории: Квотата се намалува од 49% на 40% (тука сега се вклучуваат и студентите со ретки болести и попреченост).
- Стратешки интереси: 35% од стипендиите се наменети за дефицитарни студиски програми.
- Успех: 25% се резервирани за студенти со особен успех во учењето.
Дополнително, со новиот закон целосно се бришат одредбите кои беа донесени како помош за време на ковид-кризата. Со ова, студентите кои нема да успеат да добијат место во државен дом, повеќе нема да имаат законско право на месечен надоместок до 6.000 денари за приватно сместување или за покривање на трошоците за меѓуградски превоз.
Иако во официјалното образложение се тврди дека законот нема дополнителни фискални импликации врз државниот Буџет, во јавноста веќе пристигнуваат критики дека државата постепено ја намалува својата финансиска поддршка и го префрла товарот врз семејствата на студентите.