Шест лица го загубија животот, а 34 се повредени во тешка сообраќајна несреќа што се случи на патот меѓу Терни и Риети, на границата меѓу италијанските региони Лацио и Умбрија.
Според пишувањата на италијанските медиуми, тројца од повредените се наоѓаат во тешка здравствена состојба.
Првичните резултати од истрагата покажуваат дека сообраќајката се случила кога возило-кампер преминало на спротивната коловозна лента и директно се удрило во туристички автобус.
Во верижниот судир учествувале уште три патнички автомобили кои не успеале навреме да го избегнат ударот.
Во туристичкиот автобус имало 20 патници кои патувале кон познатите водопади Марморе.
Меѓу загинатите лица се возачот на автобусот, брачна двојка која патувала во камперот, како и уште тројца патници од автобусот.
Надлежното обвинителство веќе отвори истрага за целосно утврдување на причините за несреќата.
Истражителите во моментот анализираат и снимка од камера поставена во едно од возилата, која треба да помогне во расветлувањето на околностите под кои дошло до судирот.