Кандидатот за Градоначалник на општина Охрид од редовите на Социјалдемократскиот сојуз на Македонија, д-р Асен Шајн, на вечерашната граѓанска трибина на која присуствуваше и лидерот на СДСМ, д-р Венко Филипче, рече дека реалноста во Охрид е далеку од сликата која оваа општина ја заслужува и дека е време за промени и вистински проекти.
„Граѓаните се разочарани… и со право. Многу се ветува, а ништо не се исполнува. Комуналниот развој е запоставен, градот е нечист, нема проекти, нема никаков развој. Младите заминуваат, економијата стагнира, а граѓаните живеат од денес за утре. Туризмот, кој треба да биде носечки столб на еден ваков туристички бисер, е сведен на неколку месеци хаос, а остатокот од годината живееме со истите и нерешени проблеми“, истакна Шајн.
Тој додаде дека Охрид станал лична своина на градежни инвеститори, кои со амин на локалната власт, на охриѓани приредија страшна урбана девастација.
„Штетата зазема непоправливи размери, ги загрозува природните и културните богатства и комплетно ја уништува околината. Дишеме загаден воздух, нема каде да паркираме, а јавните површини се уништени. Се навикнавме на сето она што не треба да биде нормално, нагласи кандидатот за градоначалник Шајн.
На граѓанската трибина на СДСМ во Охрид, д-р Шајн истакна дека нема да зборува за минатото, туку за иднината, бидејќи заедно со кандидатите за советници има реални идеи, нов концепт и конкретен план.
„Урбанистичкото планирање ќе има нова димензија, ќе воведеме нови еколошки практики, а на крајбрежјето на Охридското Езеро, уредување, согласно препораките на УНЕСКО. Културата и спортот ќе добијат нова енергија, а туризмот ќе го градиме на одржливи темели, со грижа кон природата, историјата и локалните потреби“, истакна Шајн.
Шајн нагласи дека инфраструктурата е негов приоритет и дека ќе води општина која нема да заборави никого.
„Секоја улица, секое мало, секое населено место ќе го добие потребното внимание. Ќе го слушаме гласот на месните и урбаните заедници, тие ќе бидат наш вистински партнер и сојузник во работата. Одлуките ќе се носат со народот, а не без него! “, рече Шајн, додавајќи дека СДСМ е партија што досега покажала дека знае да инвестира во капитални проекти и трајни вредности.
Тој напомена дека “време е да го вратиме Охрид, на охриѓани“ и дека нема да бидат заборавени ниту социјалните семејства, пензионерите, лицата со попреченост, а за учениците вети дека ќе се учат во модерни училници.
„Нашите ученици ќе се образуваат во модерни училници, а дечињата ќе добијат услови за згрижување по сите стандарди. Нашата цел е младите да ја гледаат својата иднина тука, го своето родно место“.
Доктор Шајн за себе рече дека не е човек со долго политичко минато, туку човек кој цел живот е меѓу луѓето и работи за нивното добро.
„Сум слушал и сум учел од сите вас. Знам како живеете. Знам со какви предизвици се соочувате. И токму затоа денес стојам овде, со чист образ и искрена намера, да ја побарам вашата доверба. Не за мене! Туку за една поинаква иднина за Охрид и новите генерации“, порача Шајн.
Кандидатот за Градоначалник на општина Охрид, д-р Шајн, увери дека тој и кандидатите за советници имаат капацитет и дека ќе работат чесно, домаќински, транспарентно и пред се, човечки, повикувајќи ги граѓаните на 19-ти октомври да ја дадат поддршката за него.
„Тоа не се фалби, тоа се факти. Ќе продолжиме по тој пат, со истрајност, со посветеност, со работа. Ќе покажеме дека само со СДСМ, Охрид може да оди напред, со силна визија и видливи проекти. Ја барам вашата шанса, не за политички поени. Туку за промена што ќе ја чувствувате сите. Промена што ќе донесе подобар живот за вас, за вашите деца, за секое семејство. Доста е за празни ветувања и комерцијални настани“, порача д-р Шајн на граѓанската трибина на СДСМ и Коалицијата, „Се бориме за нашиот дом“, во Охрид.