Северна Кореја вчера соопшти дека успешно тестирала „нов, најсовремен вооружен систем“ што вклучува суперсонични ракети како дел од одбранбената програма за зајакнување на нејзиното стратешко одвраќање.
Две суперсонични ракети беа лансирани од област во близина на главниот град Пјонгјанг и погодија цел на копното во североисточниот дел од земјата, објави утринава државната новинска агенција KCNA.
Агенцијата не спомена дали севернокорејскиот лидер Ким Џонг Ун бил присутен на тестот.
Северна Кореја развива суперсонични ракети кои можат да маневрираат и да ја избегнуваат воздушната одбрана на нивните цели.
Јужнокорејската војска вчера соопшти дека Северна Кореја лансирала повеќе балистички ракети со краток дострел кон морето од нејзиниот источен брег, една недела пред клучниот самит на Азиско-пацифичката економска соработка (APEC) во Јужна Кореја и очекуваната посета на регионот од страна на американскиот претседател Доналд Трамп.
Се очекува Трамп да се сретне со својот кинески колега Си Џинпинг во Јужна Кореја.
Северна Кореја последен пат истрела балистички ракети на 8 мај, кога лансираше неколку ракети со краток дострел од нејзиниот источен брег. Оваа година, Северна Кореја ја претстави својата најнова интерконтинентална балистичка ракета на парада на која присуствуваше и кинескиот премиер.