Денешниот ден, 15 јули, е прогласен за ден на жалост во Ниш, по страшната несреќа кога минибус со срспки туристи, на 12 јули излета и се преврте на магистралниот пат Котор–Никшиќ, во местото Липци, Црна Гора.
Девојката која загина во тешката сообраќајна несреќа во Црна Гора, во која 16 лица беа повредени, е 21-годишната Јована Станковиќ од нишкото село Вртиште. Нејзиното тело денеска треба да биде донесено во Ниш, а ќе биде погребана утре.
Тетката на Александар, кој пет години бил во врска со Јована, за српските медиуми вели дека кога тој дознал што се случило, заминал со мајката на Јована во Црна Гора.
-– Отишле во нашата амбасада за да видат што е потребно за нејзиното тело да биде пренесено во Ниш. Мојот внук и Јована планираа наскоро да почнат да живеат заедно, да изнајмат стан. Неодамна се вработи, беше толку среќна. Секогаш беше весела, мила, драга. Немам зборови со кои можам да ја опишам мојата тага. Јана е во болница, не е во животна опасност, но само таа знае колку ѝ е тешко што гледала како ѝ настрадува сестрата. Пред нејзини очи излетала низ стаклото, рекла жената за српските медиуми.
Приватна Архива, Јована Станковиќ
Според првичните информации од истрагата, постои сомнеж дека возачот поради замор и поспаност изгубил контрола над возилото.
Од црногорската полиција информираат дека со минибусот управувал 68-годишен маж од Котор. Возилото најпрво удрило во карпа покрај патот, по што се превртело.
Меѓу повредените има и шест деца. Едно од нив поради сериозноста на повредите било итно транспортирано во Клиничкиот центар во Подгорица, додека останатите се под медицински надзор.
Несреќата се случила околу 13:10 часот, додека групата српски државјани се враќала од поклоничко патување во манастирот Острог.
На местото на несреќата бил извршен увид под раководство на обвинител од Основното државно обвинителство во Котор. Истрагата продолжува со цел да се утврдат сите околности што довеле до трагедијата.