Новата седумгодишна финансиска рамка на Европската Унија за периодот 2028-2034 година се соочува со сериозни несогласувања уште пред да биде усвоена. Германија, Холандија, Шведска, Данска, Австрија и Финска предупредуваат дека би можеле да го блокираат предлог-буџетот доколку планираните расходи не бидат значително намалени, објави „Фајненшл тајмс“.
Според предлогот на Европската комисија, новиот буџет би можел да достигне речиси два трилиони евра. Шесте земји, кои се меѓу најголемите нето-придонесувачи во европскиот буџет и заедно обезбедуваат околу 40 отсто од приходите, сметаат дека е потребна „фундаментална реформа“ на распределбата на средствата.
– Доколку буџетските расходи не се намалат за стотици милијарди, нема да има договор за оваа година – изјавил дипломат од една од земјите што стојат зад иницијативата, пренесува „Фајненшл тајмс“.
Овие држави бараат поголем дел од средствата да се насочат кон одбраната, иновативните компании и стратешките индустрии, на сметка на намалувањето на издвојувањата за земјоделството и за помалку развиените региони, кои традиционално зафаќаат околу две третини од буџетот. Ирска, која во моментов претседава со Унијата, треба до средината на октомври да подготви компромисен предлог, со оглед на тоа што за усвојување на буџетот е потребна согласност од сите 27 земји-членки.