Министерот за внатрешни работи, Панче Тошковски, вечерва во „Клик Плус“ на ТВ21 разјасни една од најголемите дилеми за возачите поврзани со новиот систем „Сејф Сити“ – што се случува кога возилото ќе се најде среде крстосница поради метеж?
Иако камерите во тест-периодот ваквите ситуации ги бележеле како поминување на црвено светло, софтверското решение е коригирано. Сега, доколку влезете на зелено, но не ја напуштите крстосницата навреме и го блокирате сообраќајот, ќе бидете казнети за „забавување на сообраќајот“.
„Тој прекршок нема да биде третиран како поминување на црвено, туку како отежнување на движењето во рамки на крстосница. Казната за ова е 45 евра“, појасни Тошковски.
Министерот апелира до возачите самите да направат проценка – ако видат дека сообраќајот од другата страна е закочен, мора да застанат пред крстосницата дури и ако на семафорот сè уште свети зелено светло.