Едно лице го загуби животот откако мал авион се судри со полициски хеликоптер во близина на аеродромот Карлајл во североисточниот дел на САД.
Во несреќата што се случи во Пенсилванија загина пилотот на авионот, додека двајцата припадници на полицијата од хеликоптерот го преживеаа судирот.
Според изјавата на полковникот Џорџ Бивенс, авионот при приоѓање кон пистата ненадејно се насочил кон полициското летало кое летело ниско.
„Тоа беше исклучително силен судир, авионот буквално се распадна“, рече Бивенс.
Истрагата треба дополнително да потврди дали во авионот од типот „Цесна 150“ имало и други патници покрај пилотот, додека хеликоптерот од типот „Бел 407“ во моментот на несреќата изведувал воена вежба.
По судирот, еден од повредените полицајци успеал да скрши прозорец од уништениот хеликоптер за да го извлече својот колега.
За инцидентот се огласи и гувернерот на Пенсилванија, Џош Шапиро, кој порача: „Ситуацијата можеше да биде многу полоша вечерва“.
Американските воздухопловни власти (FAA и NTSB) ги презедоа истражните дејствија за утврдување на сите околности под кои се случи сообраќајната несреќа во воздухот.