Стотици граѓани вчера се собраа пред Воено-медицинската академија во Софија, изразувајќи револт поради прегазувањето на кучето Маја од докторот со македонско потекло, Ненад Цоневски, пренесе „24часа.бг“. Иако од болницата информираа дека Цоневски е суспендиран и против него е поднесена кривична пријава, демонстрантите бараа построга казна, носејќи пароли со пораката дека „убивањето куче е исто како и убивањето дете“ и дека мора да се санкционира суровоста со која е прегазена Маја.
Директорот на Државниот оддел за внатрешни работи, главниот комесар Љубомир Николов, изјави дека Цоневски е обвинет за предизвикување смрт на куче и е пуштен со кауција од 2.500 евра, при тоа негирајќи ги гласините дека 29-годишниот доктор ја напуштил Бугарија.
Протестот „Правда за Маја“ беше организиран по несреќата во населбата Расадник, каде што Цоневски, излегувајќи од гаража, го прегазил кучето, кое подоцна морало да биде евтаназирано поради тешките повреди.