Јавното претпријатие за државни патишта (ЈПДП) започна со реализација на проектот за доградба на наплатната станица „Миладиновци“. Со цел да се избегнат метежите и да се овозможи непречено одвивање на сообраќајот за време на градежните активности, од претпријатието упатија апел до сите учесници во сообраќајот во наредниот период да ја користат наплатната станица „Петровец“ како алтернативна рута.
Од ЈПДП посочуваат дека ова пренасочување е неопходно за да се намали времето на чекање и да се обезбеди побрз проток на возила. Наплатната станица „Петровец“ веќе располага со целосно функционален систем за електронска наплата, што овозможува ефикасен премин без задржувања.
Доградбата на „Миладиновци“ е дел од поширокиот процес на модернизација на патарините во државата. Целта на проектот е воведување на електронска наплата со безконтактни смарт-картички и ТАГ уреди, систем кој треба значително да го подобри протокот на сообраќај и квалитетот на услугата за корисниците.
Овој проект се реализира во рамки на договорот за изградба и инсталација на наплатни станици на Коридор VIII и на автопатот Миладиновци – Штип. Изведувач на работите е конзорциумот Аселсан – Жикол, додека финансиската конструкција е обезбедена преку заем од Европската банка за обнова и развој (ЕБОР).
Од претпријатието потсетуваат возачите да ги следат патните препораки и сообраќајната сигнализација со цел максимална безбедност и ефикасност додека траат градежните зафати.