Се организира протестен марш за поддршка на жртвите и за казни на администраторите и членовите на „Јавна соба“
Платформата за родова еднаквост во среда (3 февруари) ќе организира протестен марш за поддршка на жртвите на групата Јавна собра.
Маршот е закажан во 14:30 часот, а ќе почне од Министерството за внатрешни работи до Јавното обвинителство.
„Бараме од Јавното обвинителство неодложно и темелно да го расчисти случајот ’Јавна соба‘, кој претставува кривично дело во кое голем број жени се жртви на родово засновано насилство. Бараме соодветни казни за администраторите на групите, како и сите членови кои праќале и сè уште праќаат фотографии и пишуваат лични податоци на девојки и жени. Бараме и инсистираме сексуалното вознемирување преку интернет посебно да се регулира и во Кривичниот законик. Бараме соодветна грижа за жртвите од надлежните институции“, велат организаторите.
Овој случај, велат тие, е шанса институциите да покажат дека се залагаат за женските права и во пракса, а не само декларативно.
Протестот, нагласуваат од Платформата, ќе биде организиран со сите заштитни мерки односно ќе се носат маски и ќе се држи дистанца, а адекватен број на редари ќе се погрижат тоа да биде така за време на целиот настан.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа