Додека младите масовно се иселуваат поради сиромаштијата, власта тајно преговара за враќање и трајно прифаќање на мигранти во Македонија, обвинуваат денеска од СДСМ.
Опозициската партија се повикува на извештаи од угледни британски медиуми, тврдејќи дека земјава веќе се споменува како локација за трајна интеграција на мигранти, што би подразбирало обезбедување домови и работни места за нив.
Од СДСМ велат дека Владата на Христијан Мицкоски се обидува да ја „испере“ ситуацијата иако аналитичарите во Британија веќе зборуваат за конкретни планови.
„Сите угледни британски медиуми јавија за овие разговори само власта нешто се обидува да се испере. Аналитичарите во Британија веќе ја споменуваат Македонија како држава која може трајно да прими дел од мигрантите. Тоа значи нивна целосна интеграција, со домови, работни места итн. Не може младите да ни бегаат надвор а власта да преговара за носење мигранти“, реагираат од СДСМ.
Партијата најави дека со целиот свој капацитет ќе се спротивстави на овие, како што ги нарекува, антидржавни политики.