Владејачката ВМРО-ДПМНЕ преку Резолуцијата за мигрантите удира директно врз демократијата и слободата на говорот, исто како што тоа се правело со декретите во Третиот рајх, оценија денеска од СДСМ. Опозицијата смета дека власта се нашла во небрано со темата „мигранти за пари“ и сега се обидува преку институционален притисок да ја затвори таа тема.
Според СДСМ, Резолуцијата изгласана на 17 ноември, иако навидум се занимава со илегалната миграција, во суштина е насочена кон осуда на СДСМ за наводно ширење паника. Тие потсетуваат дека оваа тактика е веќе видена во историјата, посочувајќи на 1933 година во Германија, кога под изговор за „безбедносни закани“ биле укинати клучните граѓански слободи. За СДСМ, ова е очаен обид да се сокријат информациите кои протекоа и во британските медиуми за плановите за депортација на мигранти во замена за финансиска компензација.
Партијата од „Бихаќка“ направи и историски осврт на корените на ВМРО од времето на Ванчо Михајлов, обвинувајќи за соработка со авторитарни режими во минатото, пракса која според нив се повторува и денес преку блиските врски на Мицкоски со режимот на Вучиќ во Србија. Од СДСМ порачаа дека антифашизмот е темелна вредност на македонскиот идентитет и дека нема да дозволат замолчување на опозицијата и граѓаните.