СДСМ: Еколошка катастрофа и труење на реките, храната под ризик
Излевањето на тешки метали од рудникот Тораница во Крива Река може да биде една од најголемите еколошки катастрофи во поновата историја, предупредува опозициската СДСМ.
Потпретседателката на партијата, Каја Шукова на прес-конференција рече дека сѐ што се продава на пазарите во Скопје, Куманово, Крива Паланка, Велес и други градови се наводнува од Вардар, Пчиња и Крива Река.
-Излевањето на цијанид и други опасни материјали во Крива Река може да биде една од најголемите еколошки катастрофи во поновата историја. Излевањето на високо отровни материи од рудникот Тораница резултираше со енормно загадување на Крива Река. Според независните анализи кои ги објави општианта Крива Паланка и градоначалникот САшко Митовски, концентрацијата на тешки метали, цијаниди и други токсични материи е десетици и стотици пати над дозволеното. Ова е огромна закана за живиот свет, за бунарите, за земјоделските површини, но и аларм итно да се направат анализи и во Пчиња и Вардар, рече Шукова.
Вели, доколку не била направена анализа од страна на општина Крива Паланка во ризик ќе биле ставено многу животи.
-Инспекторатот за животна средина има огроман одговорност во овој случај и денес мора да се бара одговорсност од сите. Наместо да ја утврди вистината, Инспекторатот излезе со неосновано тврдење дека се излеала „само вода“. Доколку не се направеше независната анализа од општината Крива Паланка, заради овие паушални и очиглендо политички мотивирани тврдења на инспекторатот се ризикуваа животи! СДСМ прашува – дали ова е случајно или некој свесно ја штити компанијата Булмак 2016? Дали државни органи, под раководство на кадри на ВМРО-ДПМНЕ, учествуваат во прикривање на еколошки криминал? Дали тоа што Тони Тоневски, директорот на Булмак е истакнат партиски кадар на ВМРО-ДПМНЕ и поранешен градоначалник од нивните редови е причината за криење на вистината?, вели таа.
Шукова побара темелна и итна истрага за целиот случај.
-Овој сомнеж го подгрева и пратеникот Емил Спасовски од ДПМНЕ, кој наместо да застане на страната на граѓаните и нивната безбедност, ја политизираше целата ситуација. Наместо да бара одговорност, тој се обиде да го дискредитира градоначалникот на Крива Паланка и да ја релативизира хаваријата. Затоа СДСМ денес јавно бара: Темелна и итна истрага за целиот случај и утврдување кривична одговорност. Итно испитување на сите реки и води кои се во допир со водите од Крива Река, вклучително и делови од Пчиња и Вардар. Потенцираме и укажуваме дека можеби храната која јадеме е под ризик. Објава на сите инспекциски извештаи поврзани со рудникот Тораница. Оставка од пратеникот Емил Спасовски, кој свесно ширеше дезинформации и ја минимизираше катастрофата. Одземање на еколошката дозвола на Булмак 2016, поради сериозни и повторени прекршувања. Доста беше молк. Доста беше заштита на бизнис интереси на штета на животната средина и здравјето на граѓаните. Државата мора да покаже капацитет – или ќе има правда, или ќе има соучесништво. СДСМ нема да дозволи овој случај да помине тивко. Ќе бараме одговорност – до крај, рече Шукова.
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа