Опозициската СДСМ преку соопштение упати сериозни критики до актуелната власт, тврдејќи дека државата се наоѓа во сериозна економска и политичка криза која води кон предвремени избори.
Од партијата обвинуваат дека Владата на Христијан Мицкоски, составена од како што ја нарекуваат „тендер коалицијата“ на ВМРО-ДПМНЕ и ЗНАМ, ја довела Македонија во економски ќор-сокак, каде економијата е во слободен пад, инфлацијата ги изела платите, а јавниот долг е зголемен за над 2,5 милијарди евра за две години.
„Нема пари ниту за тековните обврски, ниту за криминалните тендери кои се потребни за збогатување на организираната криминална група. Додека за себе и за своите семејства обезбедија бугарски државјанства, европски пасоши и фирми во Бугарија, наместо да создава услови младите да останат во земјата, Мицкоски увезува работна сила од трети земји. Ова не е развојна политика – ова е признание за неуспех“, се вели во соопштението на СДСМ.
Опозицијата ја коментираше и реконструкцијата на Владата, нарекувајќи ја „чист театар“ каде наместо реформи, се случува ротација на исти лица и исти политики. Во соопштението се предупредува дека реформската агенда е во застој и дека Македонија ризикува да изгуби значителен дел од европските средства, додека другите земји од регионот, како Црна Гора, добиваат милијарди евра помош.
СДСМ тврди дека падот на рејтингот и загубата од преку 150.000 гласови се причината поради која власта веќе прави забрзани подготовки за избори, преку укинување на техничката влада и обиди за измена на изборниот закон.
„Партнерот што служеше како сателит на ВМРО и на Мицкоски – ЗНАМ, се распадна. Повеќе не постојат ниту во анкетите, ниту на терен. Секојдневно ги напуштаат членови. Сега им е потребен нов политички субјект, што ќе глуми опозиција, за да се обидат да ги поделат и расцепкаат опозициските гласови, а по изборите повторно да му послужат на Мицкоски како нов ‘сателит’. Како што рековме, кога ќе снема пари, Мицкоски ќе распише избори“, заклучуваат од СДСМ.