Министерката за финансии Гордана Кочоска денеска изјави дека во буџетот нема расположливи средства, при што, како што наведе, планираниот годишен буџетски дефицит е веќе искористен во првите шест месеци од годината, велат од СДСМ преку соопштение за јавноста.
Од опозициската СДСМ реагираат дека ваквиот развој на настаните претставува потврда на нивните предупредувања од почетокот на мандатот на актуелната Влада.
Во продолжение интегрален текст:
Граѓаните најдобро знаат какво е вистинското состојба на економијата. Доволно е да погледнат во своите паричници и фрижидери. Таму не се гледа „трета економија во Европа“, туку раст на трошоците за живот, пад на куповната моќ и сè поголема загриженост за иднината.
Додека власта зборува за рекорди и успеси, буџетскиот дефицит расте, државата се задолжува се повеќе, а реформската агенда касни.
Истовремено, поради застојот во европските интеграции и намерната изолација на земјата, се пропуштаат развојни можности, инвестиции и средства кои би можеле да ѝ помогнат на економијата и на граѓаните.
Јавниот долг, кој Владата ветуваше дека ќе го намалува, за две години е зголемен за над 2,5 милијарди евра и се зголемува на 11 милијарди евра.
Парите не отидоа за повисоки плати, за мерки за граѓаните и компаниите, ниту за капитални инвестиции. Тие завршија во криминалните партиски тендери на ВМРО.
По две години на триумфални изјави за економски раст, вистината е јасна и видлива: со Мицкоски и ВМРО, економијата се движи кон колапс.
Наместо одговорна фискална политика, граѓаните добиваат нови задолжувања кои ќе ги плаќаат преку повисоки камати, даноци и поскапи услуги.
СДСМ уште еднаш предупредува: оваа Влада нема план за економски развој. Има само план за трошење и задолжување.
Граѓаните не заслужуваат да плаќаат цена за нивната финансиска неодговорност и за политиката на изолација која ја турка Македонија назад.
Оваа влада нема ниту проевропска ниту развојна економска политика. Наместо за граѓаните, таа работи за криминални тендери, партиски интереси и привилегирани поединци.