Недостигот на јавни обвинители, несоодветните просторни услови и ограничените финансиски средства се клучните предизвици во работењето на Јавното обвинителство, истакна државниот јавен обвинител Ненад Савески за време на презентацијата на Годишниот извештај за 2025 година пред Советот на јавни обвинители.
Савески нагласи дека системските проблеми со човечките ресурси се повторуваат со години и влијаат врз динамиката на постапките.
„Имам впечаток дека еден обвинител работи работа за тројца, што влијае врз темпото на постапките, но не и врз квалитетот на обвинителските одлуки“, изјави Савески.
Тој апелираше за побрзо носење на Законот за јавно обвинителство, кој долго време е во собраниска процедура, со почитување на препораките на Венецијанската комисија во однос на буџетското финансирање. Во врска со актуелните предмети, меѓу кои и притворот за Дејан Јованов во случајот „Пулс“, Савески потсети дека одлуките за мерките ги носат надлежните обвинители согласно Законот за кривична постапка. Коментирајќи ја прославата за јубилејот од независноста, тој додаде:
„Слушнав дека Антикорупциската комисија има отворен предмет, но нивната постапка не е врзана со нашата. Секако, секоја ситуација, вклучително и оваа, обвинителството ја анализира и доколку најде основи, ќе постапи.“
Во однос на новиот правилник за избор на шеф на Обвинителството за организиран криминал и корупција, државниот јавен обвинител оцени дека тој воведува повисоки стандарди на транспарентност и им овозможува на кандидатите јавно да ги претстават своите програми.