Македонија влегува во период на нестабилно време под влијание на атмосферски фронт кој доаѓа од Алпите. Од денес (четврток), па сè до крајот на неделата, времето ќе биде променливо облачно со повремени врнежи од дожд, кои ќе бидат поинтензивни во текот на утрешниот ден.
Локално се очекува нестабилност проследена со пороен дожд, грмежи и засилен ветер. Постојат услови и за појава на невреме со електрични празнења и град. Според прогнозите, се очекува локално да наврнат над 20 литри дожд на метар квадратен.
Во Скопје и околината се очекува слично време со повремени врнежи, додека во делови од котлината ќе има услови за пороен дожд и грмежи.
Во овој период ќе дува умерен до засилен јужен ветер, кој во сабота ќе го промени правецот во северен, особено изразен по должината на Повардарието. Температурите утре ќе бидат во опаѓање (од 14 до 23 степени), додека во недела се очекува повторен пораст до 30 степени.
Дополнително, поради јужното струење, се очекува заматена атмосфера со присуство на сахарска прашина. Метеорологот Славчо Попоски појаснува:
„До крајот на неделава во атмосферата ќе ни биде присутно значително количество на Сахарска прашина и на песок па и атмосферата повторно ќе ни биде доста заматена и нечиста а дождот кој го очекувам ќе биде помешан со истата, односно дождот овие денови ќе биде валкан.“