Министерството за правда на САД вчера го реализираше најголемото објавување на докази поврзани со починатиот сексуален престапник Џефри Епстајн досега. Т.н. „Сет податоци 12“ содржи над три милиони страници документи, 180.000 фотографии и 2.000 видеа, кои фрлаат ново светло врз мрежата на Епстајн и неговите соработници.
Документите опфаќаат детали за затворањето и смртта на Епстајн во 2019 година, истрагата против неговата соработничка Џилејн Максвел, но и бројни електронски преписки со влијателни личности. Меѓу најзвучните имиња се издвојуваат актуелниот американски министер за трговија Хауард Лутник, за кого е откриено дека престојувал на приватниот остров на Епстајн во 2012 година, иако тврдеше дека ги прекинал врските со него уште во 2005.
Во досиејата се појавуваат и имињата на Илон Маск, Бил Гејтс, Доналд Трамп и Бил Клинтон. За Маск постојат индиции дека се обидувал да организира патувања на островот, додека за Гејтс се пронајдени нацрт-мејлови со компромитирачка содржина.
Освен политичките и бизнис врските, документите содржат и потресни сведоштва на жртвите. Едно од нив открива како 14-годишно девојче, кое му се доверило на Епстајн за претходно злоставување, било искористено од негова страна.