Генералниот секретар на НАТО, Марк Руте, за време на денешната посета на Скопје упати силна порака за колективната безбедност, нагласувајќи дека Алијансата е подготвена да одговори на секоја закана со „пристап од 360 степени“. На заедничката прес-конференција со претседателката Гордана Сиљановска-Давкова, Руте децидно изјави дека НАТО не е директно вклучен во конфликтот на Блискиот Исток, но будно ги следи опасностите што доаѓаат од иранскиот режим.
„Иран е извозник на хаос со децении. Нивните проектили не се закана само за Блискиот Исток, туку и за нас во Европа“, истакна Руте. Тој додаде дека светот е во подобра ситуација по елиминацијата на духовниот лидер Али Хамнеи и намалувањето на иранските нуклеарни капацитети, потези кои според него имаат поддршка од сојузниците.
Претседателката Сиљановска-Давкова порача дека посетата на Руте е јасен сигнал дека НАТО стои зад Македонија. Таа потенцираше дека земјава останува кредибилен партнер кој веќе го исполни условот за издвојување на 2% од БДП за одбрана, со амбиција таа бројка да се зголеми.