Генералниот секретар на НАТО, Марк Руте, изјави дека е уверен оти американските дипломатски напори за запирање на војната во Украина ќе донесат праведен и траен мир. Тој нагласи дека Алијансата ги поздравува иницијативите на САД и дека целта останува непроменета – суверена Украина и Русија која повеќе нема да може да ги напаѓа своите соседи.
Руте потврди дека во НАТО се работи на обезбедување безбедносни гаранции за Украина. Сепак, тој потсети дека за проширување на Алијансата е потребна едногласна поддршка од сите земји-членки, а во моментов не постои консензус за украинското членство. Коментарот беше даден по прашање за првичниот американски план со кој се предвидува Украина да се откаже од амбицијата за влез во НАТО.
Според него, европските и канадските сојузници во последните месеци обезбедиле милијарди долари за набавка на американска воена опрема за Украина. Преку иницијативата PURL, која има цел да обезбеди една милијарда долари месечно за украинските приоритетни потреби, досега се собрани околу четири милијарди долари. Руте истакна дека истата динамика ќе биде неопходна и во текот на наредната година.
На утрешниот состанок на министрите за надворешни работи на НАТО ќе се разговара за мировните напори и зајакнувањето на одбранбените капацитети. Необично е што на средбата нема да присуствува американскиот државен секретар Марко Рубио. Руте одби да извлече заклучоци од неговото отсуство, иако поранешната портпаролка на НАТО, Оана Лунгеску, предупреди дека тоа може да испрати погрешен сигнал во чувствителен момент.
САД ќе ги претставува заменик државниот секретар Кристофер Ландау.