Државниот секретар на САД, Марко Рубио, оценува дека Иран е сериозен во намерите да постигне договор со Вашингтон, пред сè поради тешката економска ситуација во која се наоѓа земјата. Сепак, во интервју за „Фокс њуз“, Рубио категорично нагласи дека секој иден договор мора трајно да го спречи Техеран да развива нуклеарно оружје.
„Мислам дека се сериозни во врска со излегувањето од неволјите во кои се наоѓаат. Сите проблеми што ги имаше Иран пред почетокот на овој конфликт сè уште постојат, а повеќето од нив се влошуваат“, изјави Рубио, посочувајќи на високата инфлација, проблемите со исплатата на платите и силниот притисок од меѓународните санкции.
Тој подвлече дека клучниот услов на САД останува непроменет: „Треба да се осигураме дека секој договор што ќе се постигне дефинитивно ќе ги спречи да се движат кон развој на нуклеарно оружје во кое било време“.
Изјавите на американскиот државен секретар доаѓаат во период кога во јавноста протекоа информации дека Иран понудил деблокада на стратешкиот Ормуски теснец, во замена за укинување на американската блокада и прекин на војната, притоа барајќи одложување на разговорите за нуклеарната програма.
Рубио остро ги отфрли обидите на Иран да го контролира теснецот. „Ова се меѓународни водни патишта. Не можеме да дозволиме систем каде што Иранците одлучуваат кој може да ги користи и колку треба да плати“, порача тој.
Воениот конфликт кој започна на 28 февруари предизвика сериозни нарушувања во глобалната економија. Низ Ормускиот теснец дневно минуваат околу 20 проценти од светските резерви на нафта, а несигурноста во регионот веќе доведе до драстично зголемување на цените на нафтата, како и на трошоците за транспорт и осигурување.
По неуспешните преговори во Исламабад на 11 април, кои следеа по двонеделното примирје посредувано од Пакистан (подоцна продолжено од претседателот Доналд Трамп), во моментов се прават нови дипломатски напори за организирање на следната рунда преговори.