Рубио изјави дека Москва треба да преземе чекори кон трајно решение на конфликтот во Украина.
„Рубио го повтори повикот на американскиот претседател Доналд Трамп за запирање на убиствата и потребата Москва да преземе значајни чекори кон трајно решение на руско-украинската војна“, се вели во соопштението на Стејт департментот.
Претходно, руските медиуми објавија дека средбата меѓу рускиот министер за надворешни работи и американскиот државен секретар во Њујорк завршила. Разговорите се одржале зад затворени врати и траеле еден час.
Пред тоа, Лавров се сретнал со претседателката на Меѓународниот комитет на Црвениот крст Мирјана Сполјариќ-Егер, со која разговарал за хуманитарните активности во клучните области, вклучувајќи ги Украина, Појасот Газа, Сирија и Судан.
Тој разговарал и со словачкиот министер за надворешни работи Јурај Бланар. Портпаролот на Кремљ, Дмитриј Песков, денес изјави дека верува оти Лавров ќе го пренесе ставот на Русија за ситуацијата во Украина на американската страна за време на средбата со американскиот државен секретар.
Лавров и Рубио последен пат се сретнаа на маргините на настанот на АСЕАН во Малезија во јули оваа година.
Лавров ќе одржи серија билатерални средби во Њујорк и ќе учествува на мултилатерални настани во рамките на Г20, БРИКС и ОДКБ, а ќе се сретне и со генералниот секретар на ОН, Антонио Гутереш.
Лавров ќе се обрати на Генералното собрание на ОН на 27 септември. Неделата на состаноци на високо ниво на Генералното собрание започна во вторник.