Вкупно 138 милиони денари Општина Аеродром ќе потроши на реконструкција на 5 улици и 13 сокачиња и тротоари. И се тоа преку договор за јавна набавка со омилената фирма од тендерските шеми на ВМРО-ОКГ, Пирамид Билдинг солушнс, овој пат како дел од група понудувачи, изјави на денешната Прес конференција на СДСМ, Милутин Ристески, советник во Советот на општина Аеродром и претседател на ОО СДСМ Аеродром.
Помпезно најавените 18 улици со вкупна должина од 5,4 километри се сведуваат на 5 улици, 10 краци на улиците Тодор Чангов и Ѓорѓи Капчев со просечна должина од 100 метри по крак и тротоар на половина од ул. Владимир Комаров.
На пример првиот крак на кракот 41 од ул. Т. Чангов со должина од само 27 метри, вториот со должина од 30 метри и третиот со должина од 24 метри пропагандата на ВМРО-ОКГ во Аеродром ги брои како 3 различни улици.
Кракот Т. Чангов 52 на пример е долг само 34 метри. За споредба тоа е отприлика иста должина колку пешачкиот премин од Бисер до Капитол.
Овие 4 сокачиња не можеме да ги наречеме улици. Тоа се буквално сокачиња со по најмногу 4 куќи на секое од нив.
Петта година по ред откако ВМРО-ОКГ е на власт во Општина Аеродром и Град Скопје не е реконструиран ниту еден булевар, не е изградена ниту една вело патека.
Направени се едвај стотина од најавените 3.000 нови паркинг места.
За споредба во мандатот на СДСМ во Аеродром за само 4 години изграден е бул. АСНОМ (од бул. Србија до В. Карангелески) и мостот Михајло Апостолски.
Реконструирани се булеварите Видое Смилевски Бато, Февруарски Поход и Васко Карангелески (од ул. Владимир Комаров до бул. Јане Сандански).
Со вкупна должина од над 10 километри реконструирани се улиците Владимир Комаров, Тодор Чангов 20, Тодор Чангов 49, Ѓорѓи Капчев 9, улица 4 во Долно Лисиче, крак 3 на бул. Трета македонска бригада, пристапната улица кај ОУ Љубен Лапе и повеќе краци во Горно Лисиче и Мичурин.
Го повикуваме градоначалникот Дејан Митески да престане да ја замајува јавноста со евтина пропаганда и сериозно да се фати за работа.
Хаосот во сообраќајот и паркирањето нашите сограѓани го чувствуваат секојдневно и нивното трпение е при крај.
Господа од ВМРО-ОКГ, Аеродром ви порачува – или фатете се за работа или отстапете место на други, додаде Ристески.