Светската програма за храна (WFP) денеска соопшти дека ситуацијата со гладот во Јемен се влошува и дека рекорден број луѓе не се во можност да ги задоволат своите потреби за храна поради ескалацијата на конфликтот во земјата.
Јемен се соочува со најлошата ескалација на конфликтот меѓу Саудиска Арабија и движењето Хути, поддржано од Иран, откако прекинот на огнот, постигнат со посредство на Обединетите нации во 2022 година, во голема мера ги запре прекуграничните напади, објавија британските медиуми.
Обновениот конфликт веќе расели десетици илјади луѓе и би можел да го промени балансот на моќта во Јемен, со последици за морските патишта во Црвеното Море и теснината Баб ел Мандеб.
Во деловите од земјата контролирани од владата, до кои WFP може да стигне, за само неколку недели рекорден број луѓе останаа без можност да ги задоволат своите основни потреби за храна.
Три од четири домаќинства прескокнуваат оброци, изјави помошникот извршен директор на WFP за програмски операции, Метју Холингворт.
Околу 10 милиони луѓе живеат во области контролирани од владата.
„Последиците од ова најново влошување на безбедносната состојба во врска со прашањето на безбедноста на храната се закануваат да бидат апсолутно катастрофални“, изјави Холингворт во Женева.