Главните јавни обвинители и обвинители кои постапуваат по предмети за воени злосторства од Западен Балкан, како и претставници на Меѓународниот резидуален механизам за кривични трибунали во Хаг, учествуваат на дводневната Регионална конференција на обвинители за соработка во постапките за воени злосторства, која денес започна во Скопје.
Настанот ја продолжува традицијата на регионални средби и обезбедува платформа за размена на искуства, зајакнување на практичната соработка и пренос на предмети и докази меѓу различни јурисдикции.
Конференцијата ја отвори државниот јавен обвинител Ненад Савески, кој истакна:
„Нас нè обединува не само нашата професија, туку и нашата заедничка, морална и законска должност. А тоа е борбата против неказнивоста за најтешките злосторства против човештвото. Освен тоа, како јавни обвинители, нашиот примарен мандат не е само да ги казниме сторителите, туку да им дадеме глас и да ги заштитиме жртвите“.
Тој додаде дека одговорноста за најтешките кривични дела е индивидуална, со што се придонесува за соживот на идните генерации.
Раководителката на Секторот за операции 1 при Делегацијата на ЕУ, Роберта Кортезе, потенцираше:
„Европската Унија придава големо значење на правдата, отчетноста и владеењето на правото во Западен Балкан. Тоа се темелни европски вредности, но и суштински елементи на процесот на европска интеграција. Во овој контекст, утврдувањето на одговорноста за воените злосторства е од особено значење. Изминувањето на времето не ја намалува одговорноста на институциите да постапуваат по тешките кривични дела и да обезбедат правда за жртвите и преживеаните. Затоа, Европската Унија силно ги поддржува напорите за зајакнување на соработката меѓу обвинителствата и правосудните институции во регионот. ЕУ го препознава поврзувањето на правдата, регионалната соработка, помирувањето и вклучувањето на граѓаните како важен дел од европската перспектива на Западен Балкан“.
Постојаниот претставник на УНДП, Армен Григорјан, истакна:
„Правдата не зависи само од формалните механизми, туку и од силните професионални врски, довербата и континуираната соработка меѓу институциите. Токму затоа, преку проектот „Поддршка на ЕУ за градење доверба во Западен Балкан“, финансиран од Европската Унија, создаваме простор обвинителите и другите правосудни професионалци од регионот да разменуваат искуства, да разговараат отворено за практичните предизвици и да ја зајакнуваат меѓусебната соработка. Нашата заедничка цел е правда која е професионална, кредибилна, заснована на човековите права и насочена кон потребите на жртвите“.
Конференцијата се организира во рамките на проектот имплементиран од УНДП и ќе заврши утре со усвојување на заклучоци и препораки за унапредување на регионалната соработка.