УХМР ги измери температурите во градовите низ Македонија, а мерењата покажуваат дека пеколот зема замав уште од рано наутро.
Со 16 степени Берово е најсвежото место ова утро во Македонија. УХМР измери 27 степени во Кавадарци во осум часот утрово, со што е најтопол град во Македонија во моментов.
Во Скопје, измерени се 23 степени Целззиусови во осум часот.
Денеска времето ќе биде сончево и многу топло, со мала до умерена облачност. Ќе дува слаб до умерен, а на места повремено засилен ветер од северен правец.
Минималната температура ќе се движи од 14 до 23 степени, додека максималната ќе достигне од 32 до 40 степени.
Во Скопје ќе преовладува сончево и многу топло време со мала до умерена облачност. Ќе дува слаб до умерен, а во делови од котлината повремено засилен северен ветер. Минималната температура ќе се спушти до 19, а максималната ќе достигне 38 степени.
Според прогнозата на УХМР, утре и задутре на места се очекува нестабилно време со пороен дожд, засилен ветер и појава на грмежи.